Condom ko kaise use karte hain/pehente hain?

Male condom kaise pehne

1.  Condom ke packet ko kinaare se dhyaan se faadhein. Packet ke andar ka condom flexible (lacheela) hota hai isliye aasani se nahi fatega. Par aap yeh dhyaan dein ki condom ke packet ko apne daant ya kisi nukeeli cheez jaise scissors se na katein. Agar condom ke packet ko kisi tarah ka nuksaan pauhcha ho ya uski expiry date nikal gayi ho toh woh wala condom use na kare.
2. Condom kis taraf khul raha hai - iss baat ka dhyaan dein. Agar ulti taraf se chadhaane ki koshish karenge toh wo penis par nahi chadhega. Agar galti se condom ko ulti taraf se chadhaya ho toh uss condom ko fenk kar dusre condom ka istmaal karein.
3.  Condom ke sire (tip) ko ungliyo ke beech dabaakar hawa nikaal dein jisse sperm ke ikkattha hone ki jagah ban sake. Ye wo sira (tip) hai jo nipple jaisa dikhta hai.
4. Condom ke sire (tip) ko pakde rakhe aur use dheere se erect (tane huye) penis par chadha lein.

Condom utarna

1. Apne penis ko normal (bina erect hui) condition me aane se pehle bahar nikaal lein.
2. Nikaalte samay condom ko niche se pakad kar rakhe  jisse sperm bahar na chhalak sake.
3. Condom ko tissue (napkin) ya newspaper me lapet kar dustbin me daal dein. Agar aap chaahe toh sperm ko bahar nikalne se bachaane ke liye uske sire (tip) par gaanth (knot) baandh lein. Condom ko toilet me flush na karein. 

Aaiye ab baat karte hain female condoms ki. Sab se pehle yeh jaan lijiye ki female condoms ki do rings hoti hain. Ek andar jaati hai aur ek bahar rehti hai. Iske baare mein aur jankari iss article main lijiye. 

Female condom kaise pehne

1. Female condom ke andar ki ring dabaayiye (choti wali), taaki unke corners ek dusre ko touch kar sake.
2. Andar ki ring jaha tak yoni ke andar ja sake, push karein aur badi ring ko bahar latakne deejiye.
3. Apne saathi ke ling (penis) ko bahari ring ki taraf guide kare.
4. Sex khatam (ejaculation) hone ke baad, condom ko teen baar fold kijiye aur bahar ki taraf kheench kar nikaaliye.

Yaad rakhein female condom keval mahilaayo ke liye nahi hai. Female condom se penis ko rub karne par purush bhi aanand feel kar sakte hai. Female condom mahilaon ke orgasm me bhi madad karta hai.

Female condom kaise nikalein?

1. Ejaculation hone ke baad bed par he leti rahein. Mat uthiye. 
2. Apni vagina se condom nikaalne ke liye condom ki bahari ring ko pakde rakhein. Ab sperm ko girne se bachaane ke liye condom ki ring ko dabayein aur ghumaaye and fir bahar nikale.
3. Condom ko dustbin me dispose kare. Flush na karein. Baad me haath dho lein.
4. Sex ke liye kabhi bhi usi condom ka use dobara na use kare. Ek condom ko ek hi baar use kia ja sakta hai.

Koi sawaal? Neeche tippani karen ya hamare charcha manch - Just Poocho pe Love Matters ke experts se poochein. Hamara Facebook page check karna na bhoolein.