Mujhe lagta hai arrange marriage kaafi achchi hoti hai,’ aisa Anushree ka kehna hai, jo ki Mumbai me rehne wali ek young, single ladki hai. Life partner choose karne ke baare me unka kehna hai, “Meri maa ko pata hai ki mere liye kya sabse behtar hai.’
Lekin Arpan ko lagta hai ki arrange marriage ek bade jua (gamble) khelne ki tarah hai kyonki do log ek dusre ko jaante hi nahi hain. Jabki love marriage me ladka aur ladki ek dusre ko jaante hain, ek dusre ki pasand, na-pasand aur ichhaon ko bhi jaante hain.” Lekin iss cheez ko dusre nazariye se bhi dekhne ki zarurat hai. Kya hota agar aap shaadi mein hee vishwaas nahi karte? Agar aap samlaingik (homosexual) hain?
Dekhiye humara ye dilchasp video aur iske baare main apni opinion zaroor batayein.
Love Marriage? Aap ise iss nazariye se dekh sakte hai…
Aap kisi ajnabi se milte hain, wo apko pasand aata hai, aap haath pakadte hain, kiss karte hain, aur fir shayad sex bhi. Pyaar ke iss modh par sab kuch achha hee lagta hai. Isliye.. aap zindagi bhar saath rehne ka faisla karte hain.
Pyaar me padna shayad aasaan hai, lekin kisi ek ke saath zindgi ke 50 saal nikalna (ya shayad usse zyada bhi) bahut mushkil hai. Saath me parivaar aage badhana koi aasan kaam nahi hain. Isliye kai baar, love marriage ka end bhi divorce ho sakta hai.
Aur shayad isliye duniya bhar me log online dating aur live-in karne lage hain. Shaadi ke baad ke taal-mail ko bhagwan bharose chodne ki bajay log love marriage me apne partner ke baare main poori jaankaari pehle se he lena chahte hain. To matlab yeh ki aap apni shaadi khud he arrange karte hain aur fir saath reh kar bhi dekhte hain.
Arrange Marriage?
Aap ise is nazariye se dekh sakte hain…
Aap apne mummy papa ko apni zindgi ka sabse zaruri faisla kaise karne de sakte hain? Ye decision bhi ki aap kiske saath sex karenge? Kiske saath bachche paida karenge?
Aap kya chahte hain, ye sabse achchi tarah se aap he jaante hain. Zindagi bhar ki khushiya shayad sirf iss par nirbhar nahi karti ki apka parivaar kaun sa hai, aap kis jaati aur dharm ke hain, aapke bank me kitna paisa hai etc. Shaadi aakhir ek aisa decision hai jis mein chemistry ya aapsi taal mail bahut zaroori hai. Apne jeewan ke pyar ko chunna aapka adhikaar hai.
Toh in the end, decision aapka hain. Lekin iss barein achi tarah se soche zaroor!
Gopneeyata ka dhyaan rakhte hue naam badal diye gaye hain aur photo mein model hain.
Koi sawaal? Neeche tippani karen ya hamare charcha manch - Just Poocho pe Love Matters ke experts se poochein. Hamara Facebook page check karna na bhoolein.