Love Matters laya hai isse related 5 important facts…
-
Miscarriage hona common hai
Miscarriage ko spontaneous abortion ya pregnancy ka apne aap khatam hona bhi kaha jata hai. Yeh kaafi pregnancies main ho jaata hai. Kayi conditions me toh mahilaa ko yeh pata hi nahi chal pata ki miscarriage ho chuka hai. Badhti age aur kayee aur reasons ki wajah se miscarriage ke chances badh jate hai toh iske liye apne apko dosh dene se pehle yeh jaan lein ki miscarriage hona common hai aur iska aapse ya apke lifestyle se koi zyada sambandh nahi hai.
-
Miscarriage ke alag alag reason aur types hote hain
Vagina me khoon ke dhabbe ya bleeding, aethan ya paet me dard, aur vagina me se fluid ya tissue ka nikalna, yeh sabhi symptoms hai ki apko miscarriage ho raha hai. Miscarriage ekdam se nahi hota aur yeh saare symptoms ek process ka hissa hai. Yeh alag alag reasons aur tarah se ho sakta hai. Miscarriage hone ke kayi possible reason ho sakte hain lekin inme sabse common hai uterus ke andar chromosonal abnormilty ka generate hona jo aksar sperm aur eggs ke andar kisi tarah ki problem hone se hoti hai. Garbhashay greeva ( uterine cervix) ya kisi aur tarah ke disorder bhi miscarriage ka reason ho sakte hain.
-
Aapke lifestyle ka bhi isme contribution ho sakta hai
Zyadatar miscarriage chromosonal abnormalities ki wajah se hote hain aur unko rokne ke liye aap zyada kuch nahi kar sakte. Lekin apki koshish yehi honi chaiye ki aap jitna ho sake utna healthy bane jisse ki concieving ke time par apki body puri tarah fertile ho. Healthy khana khaane se aur regular exercise karne se aap miscarriage hone se bach sakte hain. Apko alcohol aur smoking se bhi dur rehna chaiye kyuki dono se hi pregnancy aur ek developing (fetus) bhroon ko khatra ho saka hai.
-
Treatment zaruri hai
Pregnancy ke dauraan kisi bhi tarah ke bleeding ki suchna doctor ko turant karni chaiye kyunki pregnancy main vagina se khoon behne chinta ki baat hai. Isliye sahi diagnosis ke liye Doctor se salaah lena bohot zaruri hai. Agar khoon zada beh raha ho ya apke pet me tez dard ho raha ho (jab aap pregnant ho), toh aap ko turant medical help leni chaiye. Ek baar bleeding ka reason pata chal jaaye toh doctor aapko treatment bata sakte hain.
Zyadatar maamle me miscarriage, pregnancy ke shuru me ho jata hai aur aise me kisi tarah ke treatment ki zarurat nahi hoti. Kuch cases me, jin me kuch tissue uterus me reh gaye hote hain, unhe nikalne ke liye ek chote se procedure ki zarurat hoti hai.
5. Miscarriage ke baad
Psychologically dekha jaaye toh miscarriage ke baad dukh (sadness), kuch kho dena aur depression jaisi feelings se suffer hona common hai, lekin inn feelings ko apne dil ke andar rakhne se condition aur kharab hi hogi. Kabhi kabhi aisi conditions se se bahar aane ka sabse achcha tareeka hota hai apne kareebi ke saath apna dukh share karna, jaise ki apka partner, aapke family ya apka ek kareebi dost.
6. Agli pregnancy ka chance
Miscarriage hone ke baad zyadatar mahilaaye dobara maa ban sakti hain. Miscarriage hone ka matlab yeh nahi hai ki aap fir se pregnant nahi ho sakti. Jaise hum pehle hi discuss kar chuke hain ki miscarriage unnatural nahi hai. Bas difference yeh padta hai ki jin mahilaaye ke saath yeh huya hai unke saath iske dobara hone ki possibility thodi badh jaati hai.
Kya aapke paas miscarriage se jude koi sawaal hain? Apna experience aur suggestion hume niche likhkar ya Facebook ke zariye bataaye. Agar aapke mann me koi sawaal ho toh humaare forum Just Poocho me unhe puche.