female body
Shutterstock/Munimara

Mahilaon ke orgasm ki chaabi - Clitoris! Ye kya hoti hai?

Aaj Love Matters apko mahilaayon ke uss khaas ang (organ) ke baare me bataane ja raha hai jiska kaam chupchaap sirf orgasm dena hai. Kya kamaal ka kaam hai na!

Clitoris kya hai aur yeh kahan hota hai?

Bhangakur(Clitoris) mahilaayon ke body me paaya jaane wala ek khaas organ hai. ‘Clitoris’ word ek greek word se aya hai jiska meaning chaabi (key) hota hai (mahilaayon ke yaun sukh ke khazaane ko kholne ki chabhi!). Iska important kaam mahilaayon ko charmasukh yani orgasm dena hota hai.

Clitoris ka jo hissa baahari roop se nazar aata hai wo ek matar ke daane jitna bada hota hai. Yeh organ mahilaayon ke yoni ke theek samne yaani vagina wale hole se theek ek centimeter upar hota hai. Neeche di gayi picture mein aap iski sahi jagah ka correct andaza laga sakte hain. 

Clitoris
Shutterstock/Denissenko Oleg

Halaki clitoris ka jo hissa baahar dikhayi deta hai use hi log clitoris (clit) ke naam se bulaate hain, jabki yeh sach nahi hai. Asal me baahar dikhayi dene wala yeh hissa clitoral glen (mund) hai. 

Clitoris lamba hota hai (Ab apka dhyaan ek ling ke shape ki aur ja raha hoga, hai na?) body ke andar clitoris ke do sire hote hain ek sira vagina ki taraf hota hai aur dusra sira urethra (peshab nali) se connected hota hai. Aap samajh lijiye ki clitoris ki banawat bilkul handpump jaisi hoti hai jitna baahar nazar aata hai use kayi guna bada hissa andar gehraayi me hota hai.

Clitoris aur penis ka relation

Apko jaankar surprising lagega ki clitoris bhi ussi material se bana hota hai jinse purusho ke penis bani huyi hoti hai. Jab garbhasay (bachchadaani) mein bhroon (fetus) badhta hai toh pregnancy ke 12th week me purusho aur mahilaayon ke liye ek hi tarah ke do alag alag sexual organ (penis aur clitoris) develop hote hain.

Clitoris ka jo hissa nazar aata hai usme sira aur use dhakne wali skin dono hote hain. Yeh excited hone wale skin tissues se bane hote hain jiska matlab hai ki jab mahila uttejit hoti hain toh inn tissues me blood circulation badh jata hain aur uttejit hone par inka aakaar bhi badh jata hai. 

Inn tissues ka size 300 guna tak badh sakta hai. Clitoris ki saari khubiyan penis (uttejot hona, khoon badh jana, aur ek achchi sensation dena) me bhi paayi jaati hai. Iske alawa clitoris ke andar ke hisse me do sire aur bulb hote hain. Isiliye ise “do sire wala penis” bhi kaha jata hai.

Itna hi nahi…

Clitoris se judi sabse interesting baat hain iski sensitivity hai jiski wajah se mahilaayon ko orgasm haasil hota hai. Clitoris ke iss chote se hisse me kareeb 8000 nerve ke akhiri sire (nerve endings) milte hain jiski wajah se yeh itna zyada senstivity hoti hai. 

Purusho ke penis ke sire mein mein iski aadhi nerves milti hain, isliye wo hissa clitoris ke comparison me kum sensitive hota hai. Yehi reason hai ki purush mahilaayon jitna achcha orgam nahi mehsus karte hain. 

Ek aur baat, clitoris ka aakaar humesha badhta rehta hai. Ek 90 saal ki old lady ka clitoris adolescence me uske clitoris ke aakaar se lagbhag 2.5 guna zyada bada hota hai.

Khud se pyaar karna

Clitoris mahilaayon ke liye yaun sukh paane ka sabse aasaan tareeka hai. Sex ke samay agar aap mahila ki clitoris ko excite karna bhul gaye toh samajh lijiye ki fir unka orgasm pana mushkil hai.

 Lagbhag 75 percent mahilaayein clitoris ke uttejit hone par hi orgasm paati hain. Kuch researches ke according, bina clitoris ko uttejit kiye orgasm haasil karna lagbhag naamumkin hai. Sex ke dauraan clitoris ko chukar, kiss karke ya vibrator ke istemaal se uttejit kiya ja sakta hai.

Clitoris ko ungliyon se sehlakar uttejit karne se kaafi strong orgasm hota hai. Har mahila ka clitoris ka roop rang me ek dusre se alag hota hai, rang me yeh gehre gulabi se lekar kaale rang tak kuch bhi ho sakta hai. Wahi iske aakaar aur banawat me bhi farq rehta hai. 

Yaha tak ki har clitoris alag alag tareeko se choone par uttejit hote hain jaise ki kuch ko ekdam halke se chune par bhi uttejna hoti hain wahi kuch ko ragadna padta hai toh kuch me tezi se dabana padta hai.

Chhune ke tareeke se feel hone wala ehsaas bhi har person ke according badalta rehta hai; jaise ki kuch females ko unki clitoris par golaayi me ungliyo ferna sexual satisfaction deta hai toh dusri mahilaayo ko use dabaane ko use dabaane se halki ragad se uttejna milti hai.

Darasal clitoris ko kis tareeke se chune se zyada uttejna milti hai yeh sirf aap hi pata laga sakti hain, khud kar chookar ya orgasm dekar. Agar apko pata hai ki aapki clitoris ko kya pasand hai toh yeh baat aap apne partner ko achche se samajhaaye jisse wo sex ke samay aasaani se aapko uttejit kar sake. Yeh baat bhi dhyaan rakhe ki clitoris ke liye sabhi sparsh sukhad nahi hote hain, kayi baar unhe chune ya ragadne se dard bhi ho sakta hai.

Toh apko pehli baar clitoris se yaun sukh kab hua? Humare facebook page par Love Matters (LM) ke saath use saajha kare. Agar apke paas koi specific question hai toh kripya humare discussion board par LM specialist se puchein.

 

Comments
Add new comment

Comment

  • Allowed HTML tags: <a href hreflang>