Akhir yeh kya hota hai?
Infatuation ki koi real deifinition nahi hai lekin iske kuch khaas signs zarur hain. Dictionary ke mutabik, infatuation kisi insaan ya kisi chiz ke liye junooni lagaav hai jo thode time ke liye hi rehta hain.
Infatuation aksar one sided hota hai. Aap ke mann me kisi dusre insaan ke liye romantic feelings hoti hain lekin unke mann me aisa kuch bhi nahi hota.
Kya yeh serious problem hai?
Tab tak toh nahi jab tak hum use khud ek serious problem nahi banaate. Infatuation kisi ke liye gehra lagaav ho sakta hai aur iske kuch faide bhi ho sakte hain.
Example ke liye, aap apne professor ki taraf attract ho sakte hain aur isse aap me class me achcha perform karne ki strong desire generate ho sakti hai. Aap apni class me top marks keval iss ummeed me la sakte hain ki shayad aap apne professor ka dhyaan apni taraf kar paaye. Zaruri nahi ki aap humesha sundar ya attractive dikhna chaahe lekin aap ki koshish yeh hogi ki log apki value jaane.
Agar aap apne boss ki taraf attract ho toh shayad aap sabse pehle office pauhchna aur sabse baad office se nikalna shuru kar de. Unka dhyaan apni taraf khichne ki try me aap ke kaam me itni behtari ho jayegi jo shayad aamtaur par ho pana impossible ho.
Yeh feeling tab ek problem ban sakti hai jab kisi dusre insaan ki sehmati ke bina aap khud ko un par thopna shuru kar dete hain. Jaise ki unka picha karna ya unhe unwanted gifts bhejna.
Aisa kyu hota hai?
Iske kayi reason hote hain, lekin sabse common hai do logo ke beech ki chemistry. Jab aap ek aise insaan ko dekhte hai jisse aap attract hote hain, toh apke brain dopamine naam ke ek hormone se bhar jata hai. Isse apko achha lagta hai aur kabhi kabhi, yeh ehsaas apko itna achcha lagne lagta hai ki apko mehsus hone lagta hai ki aap dono ke beech me ek ajeeb sa lagaav hai - Bas yehi hota hai ‘infatuation’.
Kabhi - kabhi apke body ko iss feeling ki aadat pad jaati hai aur aap apne apko uss insaan ke saath ek relationship me dekhne lag jaate hain. Lekin jaise hi attraction khatam hota hai, brain me se dopamine bhi gayab ho jata hai aur dilo dimag se pyaar bhi.
Aisa kiske saath hota hai?
Infatuation kisi ko bhi kabhi bhi ho sakti hai. Chaahe apki age kitni bhi ho yeh apko ho sakta hai. Haan yeh possibility zarur hai ki auro ke comparison me kuch logo ke saath yeh zada ho lekin har kisi ki life me aisa kabhi na kabhi zarur hota hai.
Infatuation ka ehsaas pyaar ke ehsaas se milta julta hai. Lekin yeh ehsaas hota one sided hi hai. Isliye iska anjaam rishte tak nahi pauhch pata.
Aap kya kar sakte hain?
Agar aap kisi ko pasand karte hain jo apke kareebi hain toh uss insaan se baat kare. Unhe bata dein ki aap unhe pasand karte hain. Agar apko lage ki wo bhi apko pasand kar rahe hain toh aap unse date par chalne ke liye puch sakte hai. Ho sakta hai ki aap dono ek dusre ko behad pasand karne lage aur aap dono ke beech me ek mazboot love relationship ki shuruwaat ho jaaye. Yeh bhi ho sakta hai ki kuch dino ya mahino ke baad apko mehsus ho ki yaar kaha fans gaye!
Agar apko samne wala bilkul bhi ghaas na daal raha ho toh piche hat jaaye. Aap kisi ke bhi saath zabardasti relationship nahi bana sakte. Kitaabo me padhi ya filmo me dekhi tips ya apke dosto dwara share ki gayi chize, dusre insaano ke harrasment ka reason bhi ban sakta hai.
Sunne me difficult ho sakta hai lekin zara unke nazariye se bhi soch kar dekhiye.
Kya apko achcha lagega agar koi apke gale pad jaaye aur zabardasti kare ki aap bhi unhe pasand kare aur unke saath ghumne jaaye jabki asliyat me aap unke baare me aisa nahi sochte? Behtar yehi hoga ki aap unhe bhulkar kisi aise insaan ko dhunde jo apke baare me wahi feel karta ho jo aap unke baare me karte hai. Yaad rakhe, rishta wahi kaamyaab aur mazzedaar hoga jab dono partners ek dusre ke baare me same opinion rakhte ho.
Toh bas yaad rakhe ki yeh hona common hai lekin behtar hoga ki life me aage badhne ke liye aap ise ek source of inspiration banaaye.
Picture ke liye ek model ka use kiya gaya hai.
Kya kabhi aapne bhi aisa kuch feel kiya tha? Apni story humare facebook page par Love Matters(LM) ke saath share kare. Agar apke paas koi special question hai, toh please humare discussion board par LM soecialist se puche.